స్పందించిన ప్రతీ ఒక్కరికీ ధన్యవాదములు.
-x-x-x-
91
నా సుడి అప్పటిదాకా సుబ్బిగాడి మీద…. అదేనండీ పంచకళ్యాణి గుర్రమ్మీద పరిగెడుతోందీ అని అందరికీ తెలుసు. కాసులు తాత మొహంలో భావాలు చూశాక, నా సుడి కింద పడి అడ్డం తిరిగిందేమో అని అనిపించి, ఒక్కసారిగా ఒళ్లు గగుర్పొడిచింది. కానీ పాపం నా సుడి నన్ను వదిలిపోలేదు. కాసులు తాత నోరు తెరిచి కోపంగా ఏదో అనబోతుండగా, కరెక్టుగా అదే టైములో జేజి అమ్మమ్మ గట్టిగా “ఓరి భగవంతుడాఁ” అని అరుస్తూ, ఏడుపు లంఖించుకుని గుమ్మం దగ్గర కూలబడింది.. తను పాపం గందరగోళానికి ఖంగారుగా తలుపు తెరిచింది అనుకుంటా..
నా మాటలు మొత్తం వినపడ్డాయి తనకి. నన్ను తిట్టబోతున్న కాసులు తాత పరిగెత్తుకుంటూ “అత్తాఁ” అని అరుస్తూ లోపలకి వెళ్లి తన అత్తగారిని సముదాయించే పనిలో పడి నా సంగతి మర్చిపోయాడు. రంగి అమ్మమ్మ కూడా తాత వెనకాలే ఇంట్లోకి పరిగెత్తింది. జీవీ మాత్రం నన్ను లోపలకి వదల్లేదు. పోనివ్వకుండా ఆపేసి, “చిన్న దొరా! ఇక్కడ ఉండొద్దు. చూసుకోవడానికి చాలామందే ఉన్నారు కానీ, వెంటనే ఇక్కడ నుంచి వెళ్లిపో! నీకు మంచిది కాదూ అని చెబుతే అర్థం కాదా?” అంటూ నా రెక్క పుచ్చుకుని నన్ను రోడ్డు మీదకి తోసి, గేటు మూసేసింది. నేను తోచక మేడ మీదకి ఓ సారి చూశా.
శంకరత్త పైన పిట్టగోడకి ఆనుకుని నుంచుని, ఇదంతా చూస్తోంది. తనూ సీరియస్ ఫేసుతో నన్ను పొమ్మని వేలితో సైగ చేసింది. నేను కాళ్లీడ్చుకుంటూ జేబులో చేతులు పెట్టుకుని, దుర్గమ్మ ఇంటి వైపు నడక మొదలెట్టా. జేబులో చెయ్యి పెట్టగానే, ఖాళీ అయిపోయిన వీట్ డబ్బ తగిలింది. నాకో అల్లరి పని చెయ్యాలీ అని అనిపించి, అటూ ఇటూ చూసి, దాన్ని ఈరిగాడు తాత గుమ్మం పక్కన పడేసి, పరిగెత్తా. నేను వెళ్ళేసరికి టైం ఆల్మోస్ట్ 4. తలుపులు మూసేసి ఉన్నాయి. నేను దొడ్డి వైపు వెళ్ళేసరికి, ఆ తలుపు తెరిచి, గ్యాప్లోంచి వంటింటి లైట్ సన్నగా దొడ్లోకి పడుతోంది.
నేను దొడ్లో కాళ్లూ చేతులూ శుభ్రంగా కడుక్కుని, దండెం మీద నావి పొడి బట్టలుంటే తొడుక్కుని, మాసిన బట్టల కుప్పలో నేను విడిచినవి పడేసి, చప్పుడు చెయ్యకుండా పోయి, తలుపు తీసి చూశా. అక్కడ తిమ్మడు మామ పడుకుని ఉన్నాడు. ఫుల్లు సౌండ్ స్లీప్. గురక పెడుతున్నాడు. దుర్గమ్మ గదిలోకి తొంగి …
