స్పందించిన ప్రతీ ఒక్కరికీ ధన్యవాదములు.
-x-x-x-
84
ఇద్దరు గూడెం కుర్రాళ్లూ బిక్కు బిక్కుమంటూ, ఆ ముగ్గురూ + స్పృహ లేకుండా పడి ఉన్న అన్నకీ కాపలా కాస్తూ ఉన్నారు. బగ్గీ పూర్తిగా ఆగకుండానే, వెనకాలే కూర్చున్న కాసులు తాత బండి లోంచి ఉరికి పెద్ద అంగలు వేసుకుంటూ వాళ్ల దగ్గరకి వెళ్లాడు. తిమ్మడు మామ వాళ్ల కాలి బొటన వేళ్లూ చేతి బొటన వేళ్లూ కలిపి కట్టేశాడు. వెరైటీగా ఉన్నాయి ఆ కట్లు. మావాళ్లు ఇద్దరు. వీళ్లు నలుగురు. కట్లు విప్పుకుని ఆ ఇద్దరినీ కుమ్మేసి, తమ వాడిని తీసుకుని సైలెంటుగా వెళ్లిపోవచ్చు. ఈజీగా విడిపించుకోవచ్చు. అయినా వాళ్లు కట్లెందుకు విప్పుకోలేకపోయారో, నాకు అర్థం కాలేదు.
కాసులు తాత పక్కన చేరి అదే అడిగా. తాత నాకు ఆన్సర్ ఇవ్వకుండా, ప్రాక్టికల్గా చూపించాడు. నా బొటన వేళ్లు రెండూ కలిపి కట్టేసి, నన్ను విప్పుకోవడానికి ట్రై చెయ్యమన్నాడు. నేను ఓ పావుగంట సేపు, ఎంత ట్రై చేసినా, ఆ కట్లను వదిలించుకోలేకపోయా. ఇంతలో తాతా-రంగి అమ్మమ్మా-అమ్మమ్మా-ఈరిగాడు తాతా నలుగురూ వాళ్ల ముందర బాసెంపట్టు వేసుకుని కూర్చుని, అసలు ఆ అన్న మీద ఎటాక్ ఎందుకు అయ్యిందో, అన్నని ఎట్లా కాపాడారో, తిమ్మడు మామ అనుకోకుండా వాళ్లని కుమ్మినందుకు సంజాయిషీ ఇస్తూ, అసలు విషయాన్ని వివరిస్తూ ఉన్నారు.
పావుగంట తర్వాత తిమ్మడు మామా, శివ మామా, కూడా ఇంకో 2 కుర్రాళ్లూ బాణా కర్రలు పట్టుకుని వచ్చే టైముకి ఆ అన్నలకి అసలు విషయం అర్థం అయ్యి, కొంచెం శాంతించారు. నేను తిమ్మడు మామ పక్కకి పోయి, ఆ బొటన వేళ్లు కలిపి కట్టే రహస్యం ఏంటని అడిగా. నా జుట్టులో చెయ్యి పెట్టి చెరిపేస్తూ, నన్ను పక్కకి తీసుకెళ్లి, “సిన్నదొరా! ఏ కట్టు అయినా విడిపించుకోవాలీ అంటే చేతి వేళ్లు సులువుగా మడవగలగాలి. ఇలా బొటనవేళ్లు రెండూ కలిపి కట్టేశామే అనుకో, సరిగ్గా వాటిని కదపలేరు. విప్పడం కాదు కదా? ముడిని సరిగ్గా పట్టుకోలేరు కూడా” అంటూ చెప్పసాగాడు.
నా డౌట్ ఇంకా వదల్లేదు. “మరి నోటితో విప్పుకోవాల్సింది మామా? అదెందుకు చెయ్యలేదూ??” అని అడిగా. “అందుకే కదా కాలి వేళ్లతో కలిపి చేతి వేళ్లు కట్టేసింది? చచ్చినా విడిపించుకోలేరు. నోటితో విప్పాలీ అంటే చాలా కష్టం” అన్నాడు. అయినా నేను మళ్లీ, “అయితే …
