స్పందించిన ప్రతీ ఒక్కరికీ ధన్యవాదములు.
-x-x-x-
99
ఇంతలో దూరంగా మాకు పేలుళ్ల శబ్దాలు వినిపించి, నలుగురమూ ఓకేసారి ఉలిక్కి పడ్డాము. అవి అడవిలోంచి వినిపించాయి. వాగు ఉన్న వైపు నుంచి కాదు. ఏవో బాంబులు పేలిన శబ్దం. ఒకటి కాదు రెండు కాదు. వరుసగా ఏడు బాంబులు పేలాయి. నేను వెంటనే పిట్టగోడెక్కి ఎటువైపు నుంచి వస్తున్నాయా? అని చూశా. ఆ శబ్దాలు, గూడానికి రెండో వైపున గంజాయి పంట తగలడిపోయిన వైపు నుంచి వస్తూ ఉన్నాయి. పేలుళ్ల తరువాత కాసేపు నిశ్శబ్దం కమ్ముకుంది. ఆ తర్వాత బుల్లెట్ శబ్దాలతో అడవి దద్దరిల్లిపోసాగింది. కాల్పులు. రెండు టీములు కాలుస్తున్నాయి.
ఎందుకంటే, ఒక రౌండు శబ్దాల తర్వాత, ఓ పది సెకండ్లు నిశ్శబ్దం. తర్వాత ఎదురు కాల్పుల మోత వినిపిస్తూ ఉంది. నా అంచనాలు నిజమైతే, ఒక టీం ఆ రోజున మాకు కనిపించిన అన్నల టీం. రెండో టీం సెక్యూరిటీ ఆఫీసర్లా? లేక మంథరాదేవి గూండాలా? అని చిన్న కన్ఫ్యూజన్. ఓ పది నిముషాలు కాల్పుల మోతతో అడవంతా హోరెత్తిపోయింది. పక్షులూ-జంతువులూ ఆ కాల్పుల శబ్దాలకి బెదిరిపోయి, అడవిలో అలజడి సృష్టించడం మొదలు పెట్టాయి. వాటి అరుపులూ కాసేపు మోత మోగాయి. ఓ పావుగంట తర్వాత స్మశాన నిశ్శబ్దం కమ్మేసింది. ఎటువంటి శబ్దాలూ వినిపించలేదు.
దుర్గమ్మ భయం భయంగా పిట్ట గోడెక్కిన నా చెయ్యి పట్టుకుని గుంజుతూ, “చిన్న దొరా.. కిందకి దిగిపో.. వద్దు” అంటూ నన్ను బ్రతిమాలసాగింది. పిచ్చి మామ్మ! నేనెవరికి కనిపిస్తా చెప్పండి. మా గూడెం చుట్టూ పెద్ద పెద్ద వృక్షాలు ఉన్నాయి. ఈ కాల్పులు కూడా ఎక్కడో ఏడెనిమిది కిలోమీటర్ల దూరంలో జరిగాయి. అడవి కనుక, ఆ శబ్దాలు ఇంత దూరం వినిపించాయి. అదే ఏ పట్టణ ప్రాంతమో అయితే, ఒక్క కిలోమీటర్ దూరం కూడా వినిపించవా శబ్దాలు. అదే మాట అంటూ నేనొక్కసారిగా ఉలిక్కిపడ్డా. నిన్న తెల్లవారుఝామున అమ్మా డైరెక్షన్లో నేనూ రైఫిల్ పేలుస్తూనే ఉన్నా కదా?
ఆ శబ్దం అటువైపు వాళ్లకి వినిపించి ఉండి ఉంటే? అసలు ఈ గొడవ మొత్తానికి ఆ కాల్పులే కారణం అయ్యి ఉండి ఉంటే? నాకొక్కసారిగా వెన్నులోంచి వణుకు పుట్టి, కాలు తడబడింది. దుర్గమ్మ గట్టిగా పట్టుకోవడం వలన, నేను వెనక్కి తూలి మామ్మ మీద పడ్డా. లేదంటే, ఢామ్మంటూ పిట్టగోడ మీద నుంచి ముందుకు తూలి, వీధి గుమ్మం ముందర ఉన్న నాపరాళ్ల మీద పడి నా బుర్ర పగలకొట్టుకునేవాడిని. …
