స్పందించిన ప్రతీ ఒక్కరికీ ధన్యవాదములు.
-x-x-x-
93
అమ్మమ్మ సైలెంటుగా వచ్చి, వంటింటి గోడకి ఆనుకుని నుంచుని, ఖంగారుపడుతూ మమ్మల్ని ఆవేశంగా తిడుతున్న శంకరత్తనే ప్రేమగా చూస్తూ ఉంది. నేను మెల్లగా గొణుగుతూ, “అత్తా… వెనకాల అనకొండ ఉంది చూసుకో…..” అంటూ గొణిగా.. నా గొణుగుడు అత్త పట్టించుకోలేదు కానీ, అమ్మకి వినపడి, “అమ్మా.. వచ్చావా? శంకరి మరీ పిచ్చి ప్రేమ పెంచేసుకుంటోంది మన మీద” అని అంటూ “రావే.. ఇటొచ్చి కూర్చో” అంటూ అమ్మ నాకు ఇంకా దగ్గరకి జరిగి, అమ్మమ్మకి తన పక్కన ప్లేస్ ఇచ్చింది. అమ్మ మాటలకి వెనక్కి తిరిగి శంకరత్త, ఓ క్షణం తన దండకం ఆపింది.
అమ్మమ్మ వచ్చి అమ్మకి ఆ పక్కన కూర్చుంది. శంకరత్త మాత్రం, తన ఫ్లో తిరిగి మొదలెట్టి, అస్సలు ఆపకుండా, “అత్తయ్యగారూ.. మీకేమైనా ఇది బాగుందా చెప్పండి? చూడండి ఇద్దరి భుజాలూ ఎట్లా కమిలిపోయాయో. ఈ బండ మనిషికి అయితే ఇంతలావు వాచిపోయినా కా-కీ అనకుండా కూర్చున్నాడు చూడండి. ఎందుకండీ వీళ్లని కష్టపెట్టడం” అంటూ అమ్మమ్మ మీద దాడి మొదలెట్టేసింది. అమ్మమ్మ మౌనంగా అత్త తిట్లు భరిస్తూ, అమ్మ ఫోనులో మంథరా దేవి పెట్టిన మేసేజ్ చదివి, ఏదో గొణుక్కుంటూంటే, తననే అనుకుని, శంకరత్త ఒక్కసారిగా నోరు మూసేసింది.
అమ్మమ్మ అత్త వైపు తిరిగి, తన తల నిమురుతూ, “శంకరీ నువ్వు బంగారమే. నేను గొణుక్కుంటోంది నీ గురించి కాదు. ఖంగారు పడకు. ఇందాక యుద్ధాలు చెయ్యాలా ఏంటీ అన్నావుగా? అవును. మన ముందరకి ఓ పెద్ద యుద్ధం రాబోతోంది. అందరూ సిద్ధంగా ఉండాల్సిందే. నా కూతురూ, మనవడూ అని తేడా ఏమీ ఉండదు” అంటూ అమ్మ షర్ట్ జరిపి అమ్మ భుజమ్మీద కమిలినది చూసి, “బంగారానికి పర్లేదు. దొరవారి సంగతి చూడు. ఆయన మధ్యాహ్నానికి చెయ్యి పైకి లేపాలి. దొర వారికి కాపడం పెట్టు. ఉప్పు చల్లారిపోయింది, ఇంకోసారి వేడి చెయ్యి” అంటూ పురమాయించింది.
ఈలోపు చిలకమ్మ అమ్మకీ అమ్మమ్మకీ కాఫీ కలుపుకుని వచ్చింది. ఇద్దరూ కాఫీ తాగుతూ నన్ను పట్టించుకోకుండా మంథరాదేవి స్ట్రాటజీ ఏంటా? అని డిస్కషన్ మొదలెట్టారు. నేను మెల్లగా లేచి, పొయ్యి దగ్గర నుంచుని గోళ్లు కొరుక్కుంటున్న శంకరత్త పక్కకి పోయి, చిన్నగా, “అత్తా.. ఎనిమిది రోజుల ముందర మనం చూసిన ఏనుగుల దగ్గరనుంచి, నిన్న తగలెట్టిన గంజాయి పంట వరకూ ఒక్కళ్లే …
