స్పందించిన ప్రతీ ఒక్కరికీ ధన్యవాదములు.
-x-x-x-
71
వచ్చిన వాళ్లిద్దరూ ఓ మూల గోడకి ఆనుకుని నుంచున్నారు. అమ్మమ్మ మాత్రం తన ఆలోచనల్లోంచి బయటపడట్లేదు. ఎట్లా అయినా నన్ను గూడెం దొర అవ్వకుండా ఆపాలీ అనే ఆలోచిస్తోంది. నాకు మాత్రం మనసులో ఏదో తేడా కొడుతోంది. అమ్మమ్మ కాళ్లు జాపుకుని పడక కుర్చీలో పడుకుని, పాత సినిమాల్లో సీనియర్ విలన్ కూర్చున్నట్టు కూర్చుంటే, శంకరత్త ఓ మోకాలి మీద తల పెట్టుకుని పడుకుని ఆలోచిస్తోంది. దుర్గమ్మ రెండో కాలుని వాటేసుకుని అమ్మమ్మ మోకాలి మీద తల పెట్టుకుని ఆలోచిస్తోంది.
చిలకమ్మ వంటింటి తలుపుకి ఆ పక్కన గోడకి ఆనుకుని కాళ్లు పక్కకి ముడుచుకుని కూర్చుంది. నేను స్వాతక్క బెడ్రూం, వంటిల్లు మధ్యలో ఉన్న గోడకి ఆనుకుని నుంచున్నా. అమీనా-సత్య ఇద్దరూ ఇంకో గోడకి ఆనుకుని నుంచున్నారు. దొడ్డి తలుపూ, వీధి తలుపూ తీసున్నాయిగా, చల్లని గాలి స్పీడుగా ఇంట్లోకి వస్తూ అందరికీ కొంచెం చలి పెడుతోంది. నేను కదిలి దొడ్డి తలుపు వెయ్యడానికి వెల్తూండగా, చిలకమ్మ సన్నగా అరుస్తూ, “దొరసానీ! నాకో ఆలోచన వచ్చింది. ఎట్లానూ మనం మన దొరకి పోరాటవిద్యలు నేర్పిద్దాం అని అనుకున్నాముగా?
అవి నేర్చుకుంటూ దెబ్బకొట్టుకున్నాడూ అన్నట్టు కాలికో చేతికో ఓ దొంగ కట్టు కట్టేస్తే, దొర జోలికి ఎవరూ రారూ.. పైగా వైద్యం పెరుతో కుసుమక్క వెంటనే దొరని పట్నం తీసుకుపోతుంది. ఆ ఇబ్బందీ ఉండదు. దొర ఇక్కడా ఉండడు. ఈ పని కుసుమక్క వచ్చాక, ఎల్లుండే చేసేస్తే ఉత్తమం. మనం దొర పట్టాభిషేకం ఆపాలీ అంటే, దొరని ఇక్కడనుంచి తప్పించడమే. వేరే దోవ కానొస్తల్లే” అని ఓ చేతులు తిప్పేస్తూ ఆనందంగా చెప్పింది. దుర్గమ్మ చిలకమ్మ వైపు పోవే పుస్కీ అన్నట్టుగా ఓ చూపు చూసి, “అక్కడ మామ్మగారు ఉన్నారు.
చావు నోట్లోంచి మనిషిని వెనక్కి లాక్కుని రాగలదు ఆవిడ. చిన్న దొర కట్లతో ఆవిడకి కనిపిస్తే చాలు. అరగంటలో పరిగెత్తేలా చెయ్యగలదు. దొర వంటిమీద చెయ్యి వెయ్యగానే, ఆవిడకి అది దొంగ దెబ్బ అని అర్థమైపోతుంది” అంటూ చిలకమ్మ మాట కొట్టేసింది. అమ్మమ్మ మాత్రం చేతిలో ఉన్న …
