episode-67
మరుసటి రోజు పొద్దున్న నాకు మెలుకువ వచ్చి బెడ్ మీద నుంచి లేచి కిటికీ దగ్గర నుంచుని బయటకు చూస్తున్నాను. మేము ఉన్నది ఫ్లోరిడా ఎయిర్పోర్ట్ దగ్గరలో ఉన్న ఒక చిన్న హోటల్. కొత్త ప్రదేశం కావడంతో బయట ఉన్న బిల్డింగులు రోడ్డు మీద తిరుగుతున్న వాహనాలు చూస్తూ తెల్లవారి వాతావరణాన్ని ఆస్వాదిస్తూ ఉండగా నా రూమ్ డోర్ చప్పుడు వినిపించింది. నేను వెంటనే వెళ్లి డోర్ ఓపెన్ చేసి చూడగా బయట బెంజి నిలబడి ఉన్నాడు. గుడ్ మార్నింగ్ దీపు,,, అని పలకరించగా గుడ్ మార్నింగ్ సర్,, అని అన్నాను. దీపు నువ్వు తొందరగా తయారై నీ లగేజ్ ప్యాక్ చేసుకో మనం ఒక గంటలో బయల్దేరుతున్నాము అని అన్నాడు. …. నాకు ఒక్కసారిగా మైండ్ బ్లాక్ అయింది. ఇక్కడే ఉంటాం కాబోలు అని అనుకొని నిన్న రాత్రి నేను నా లగేజ్ అంతా ఓపెన్ చేసి పెట్టుకున్నాను. ఇప్పుడు చూస్తే ఇంత సడన్ గా వచ్చి మళ్లీ లగేజ్ ప్యాక్ చేసుకోమంటాడు ఏంటి? ఈ బెంజి నాకు అస్సలు అర్థం కాడు అని అనుకుని గబగబా తయారై మళ్ళీ నా లగేజ్ మొత్తం ప్యాక్ చేసుకుని రెడీ అయ్యాను.
ఒక గంట తర్వాత మేమిద్దరం హోటల్ ఖాళీ చేసి రోడ్డు మీదకు వచ్చాము. బెంజి అటుగా వస్తున్న ఒక టాక్సీని ఆపి ఏదో అడ్రస్ చెప్పిన తర్వాత మా లగేజ్ డిక్కీలో పెట్టి టాక్సీలో కూర్చున్నాము. సిటీ దాటుకుని కొంతదూరం ప్రయాణించి సరిగ్గా ఒక గంటన్నర తర్వాత ఒక ఇంటి ముందు టాక్సీ ఆగింది. బెంజి కారు ఛార్జి చెల్లించి మా లగేజ్ తీసుకున్న తర్వాత ఆ ఇంటి డోర్ దగ్గరికి నడిచాము. అది ఒక నిర్మానుష్యంగా ఉన్న ప్రాంతం. ఒక పద్ధతి ప్రకారం నిర్మించిన కాలనీ లాగా కనబడుతుంది. ప్రతి ఇంటి ముందు చిన్న గార్డెన్ ఏరియా, పార్కింగ్ గ్యారేజ్ తో కూడిన ఇళ్ళు వరుసగా ఉన్నాయి. ఎదురుగా పచ్చిక నిండిన మీడియన్ తో డబుల్ రోడ్డు, ఆ రోడ్డు దాటిన తర్వాత చుట్టూ దట్టమైన చెట్లతో నిండిన ఒక పెద్ద పార్కు ఉండి చాలా ప్రశాంతంగా ఉంది ఆ ఏరియా. కొంచెం జాగ్రత్తగా పరిశీలిస్తే ఇక్కడ ఒక ఇంట్లో ఎవరు ఉంటున్నారో మరో ఇంట్లో వారికి తెలుసో లేదో అన్నట్టు అనిపిస్తుంది.
బెంజి డోర్ బెల్ కొట్టగా నేను అతనికి కొంచెం దూరంగా నిలుచున్నాను. ఒక రెండు నిమిషాలకి డోర్ ఓపెన్ అయ్యింది. ఒక అమ్మాయి బయట నిల్చుని ఉన్న బెంజిని చూసి అవాక్కయ్యింది. మళ్లీ అంతలోనే తేరుకొని కళ్ళు పెద్దవి చేసుకుని ఆశ్చర్యపోతూ, యేయేయే,, నువ్వు ఎప్పుడు వచ్చావురా? అంటూ బెంజి మీదకి ఎగిరి దూకి కౌగిలించుకొని బుగ్గ మీద గట్టిగా ముద్దు పెట్టి, లోపలి వైపు చూసి అరుస్తూ, హే డార్లింగ్,,, ఇదిగో చూడు ఎవరొచ్చారో? నువ్వు ఉంచుకున్నోడు వచ్చాడు అంటూ గట్టిగా చెప్పింది. …. హేయ్ పప్పీ,,, అని పలకరించి బెంజి …
