ఒక గంటసేపు పని చేసిన తర్వాత విక్రమ్ ఒక లాప్టాప్ లో ఆ ప్రాంతం తాలూకా శాటిలైట్ ఇమేజ్ మాకు చూపించాడు. కానీ లోపల ఎలా ఉందో తెలుసుకోవాలంటే సాటిలైట్ స్కాన్ చేయవలసి ఉంటుంది దానికి మరొక గంట సమయం పట్టే అవకాశం ఉంది అని చెప్పాడు విక్రమ్. మాకు తెలిసిన సమాచారం ప్రకారం అక్కడ మీటింగ్ జరగాలంటే చాలామంది స్మగ్లర్లు రావాల్సి ఉంది కాబట్టి మనం వెయిట్ చేయక తప్పదు అని ఒక నిర్ణయానికి వచ్చి విక్రమ్ ని తన పని చేసుకోమని వదిలేసాము. మేము మాత్రం అక్కడ జరుగుతున్న యాక్టివిటీస్ అన్నింటిని జాగ్రత్తగా వాచ్ చేస్తున్నాము. ఆ మేడ లాగా ఉన్న ప్రాంతంలో సుమారు ఒక ఐదుగురు గస్తీ కాస్తున్నారు. ఇంకా చుట్టుపక్కల చెట్ల మీద ఎంతమంది ఉన్నారు అన్నది తెలియాలంటే సాటిలైట్ స్కానింగ్ అందుబాటులోకి వచ్చే వరకు వెయిట్ చేయాలి.
మరొక గంటన్నర సమయం తర్వాత విక్రమ్ సాటిలైట్ స్కానింగ్ అందుబాటులోకి తెచ్చాడు. అందులో నుంచి ఆ డెన్ లోపలి భాగాన్ని చూసి మేమందరం విస్మయం చెందాము. ఆ కొండ లోపల చాలా వరకూ తవ్వేసి ఒక మినీ ఇండోర్ స్టేడియం లాగా తయారుచేయబడింది. ఒక పక్క గొడౌన్ లాగా ఉండి అందులో చాలా వరకు సామాగ్రి ఉన్నట్టు కనబడుతోంది. మధ్యలో ఒక వాలీబాల్ గ్రౌండ్ అంత ప్లేస్ కనబడుతుంది బహుశా అది కాన్ఫరెన్స్ హాలు అయి ఉండొచ్చు. మరోవైపు కూడా రెండు రూములు కనబడుతున్నాయి వాటికి ఆనుకొని బయటివైపు మరొక రూమ్ కనబడుతోంది. ఆ రూమ్ లో కంప్యూటర్ సెటప్ ఉన్నట్టు సిగ్నల్స్ ద్వారా తెలుస్తోంది. అంటే మా ఆపరేషన్ ముందు అక్కడి నుంచి మొదలు పెట్టాలి. గుహ లాగా ఉన్న ప్రాంతంలో కొంచెం లోపలికి ఆటోమేటిక్ ఎలక్ట్రికల్ గేట్ ఉంది.
దానికి కొంచెం పక్కన బయట నుంచి కంప్యూటర్ రూమ్ లోకి వెళ్లడానికి ఒక డోర్ ఉంది. మేము చాలా సేపు గమనించిన తర్వాత తెలుసుకున్న విషయం ఏమిటంటే, లోపలికి వెళ్లి వస్తున్న వ్యక్తులు వెళ్లేముందు తమ ఆయుధాన్ని కంప్యూటర్ రూమ్ లో ఒక పక్కన పెట్టి చేతి వేలి ముద్రలు స్కానింగ్ ద్వారా ఆ గేటు తెరుచుకుని లోపలికి వెళుతున్నారు. తిరిగి బయటకు వచ్చిన తర్వాత మళ్లీ తమ ఆయుధాన్ని తీసుకొని తమకు కేటాయించిన ప్లేస్ దగ్గరకు వెళ్లి గస్తీ కాస్తున్నారు. అంటే లోపలికి ఆయుధాలు తీసుకువెళ్లడం నిషేధము అని మాకు అర్థమైంది. బహుశా లోపల పేలుడు పదార్థాలు లేదా అంతకంటే విలువైన ఇంకేమైనా వస్తువులు ఉండి ఉంటాయి …
